Misty Isle! next day it lived up tae it’s name.
We didna see much as tae Staffin we came.
Tae miss a’ these views we felt wis a shame,
But it cleared noo’ an’ then.
Dunvegan Castle, the hame o’ the Dame
Wis oor journey’s en’.
We looked at the castle but that wis a’;
The Fairy Flag we never saw;
Oor time wis short – we went tae ca’
At the village store
Where we saw the Macleans an’ where ane an’ a’
Had raspberries galore.
Fur Sligachan then we took oor gait,
Ower roads that kept us a’ gey quate.
The first o’ five, we led in state
Wi’ a Rover ahin,
Wi’ PVC on its number plate,
An’ a couple within.
The Bungalow wis oor stoppin’ place,
An’ next morning, gey early, we j’ined the race
Tae Kyleakin, an’ there we took oor place
In the ferry queue;
Across in an hoor we took up the chase
Oor goal Strome noo.
An hoor again an’ we were ower’
(We’ve heard o’ folk wha waited fower);
Ye couldna see us then fur stour
As on we hopped
(Poetic licence!) – in less than an hoor
Fur lunch we’d stopped.
Then Achnasheen an’ Kinlochewe
By Loch Maree – My! whit a view.
Across tae Slioch! Gairloch noo
‘S oor destination.
Ae thing there pit us in a stew –
We got fixed up eventually
At Myrtlebank an’ at the Chalet,
An’ after dinin’ oot we did sally
Tae phone oor maw
Tae hear frae her whit had happened locally
Since we’d been awa’.